L’Euroregion Pirenèus Mediterranèa dobrís la convocacion del Fons d’ajuda euroregional per donar responsa a la crisi generada per la Covid-19. Lo fons a un montant total de 700.000€, dobèrt a projèctes e accions dels cinc domenis sectorials pels quals trabalha l’EPM: innovacion, environament e cambiament climatic, ensenhament superior e recèrca, torisme e cultura.
La creacion d’aquel fons emana de la volontat manifèsta de las presidéncias dels tres territòris. Lo fons es tanben una mòstra de l'engatjament de l’EPM envèrs los territòris e los ciutadans qu'i trabalhan. L’objectiu del fons es palliar los efièches de la crisi sanitària e relançar l’economia dels territòris que son dins l’EPM.
L’EPM es un projècte politic de cooperacion territoriala nascut en 2004 amb lo sostenement de l'Union Europèa. Ne son a l'ora d'ara de membres la Region d’Occitània, la Generalitat de Catalonha e lo Govèrn de las Islas Balearas, que n’exercís la presidéncia, rotatòria, dempuèi febrièr de 2019.
L’Euroregion Pirenèus Mediterranèa (EPM) a dobèrt uèi la convocacion per optar al Fons d’ajuda economica per amor de respondre a la crisi generada per la pandèmia de la Covid-19. Aquel fons, que monta a 700.000€, constituís una responsa especificament euroregional a la situacion que vivon los actors que trabalhan amassa a las Islas Balearas, Catalonha e la Region d’Occitània.
Los candidats que vòlgan beneficiar del fons de sosten Covid-19 poiràn enviar una sollicitud entre lo 8 de junh e lo 31 d’octòbre de 2020.
Lo fons d’ajuda euroregional se destina a cinc grands airals tematics, que coincidisson amb los cinc grands airals d’accion de l’EPM: l'innovacion, l'environament e lo cambiament climatic, l’ensenhament superior e la recèrca, lo torisme e la cultura.
Pòdon optar al fons un grand ventalh d’actors: d'organismes territorials, entrepresas, universitats, centres de recèrca (publics e privats), associacions, fondacions, entrepreneires...
Lo fons s’articula a l'entorn de sièis objectius especifics:
1. L'innovacion e la recèrca: l'innovacion a d’èsser al servici d’una Euroregion autosuficienta en matèria d'agroalimentari.
2. Ensenhament superior: permetre l'inclusion de totes los estudiants de las universitats euroregionalas gràcias l’ensenhament a distància.
3. Torisme: l’Euroregion deu èsser una destinacion segura, duradissa e resilienta.
4. Mitan natural: l’economia circular deu èsser una prioritat euroregionala. Cal metre en relèu lo concèpte de la proximitat davant las crisis sanitàrias.
5. Adaptacion al cambiament climatic: cal promòure l’adaptacion al cambiament climatic en totes los sectors per aténher una melhora resiliéncia, mai que mai davant las crisis sanitàrias.
6. Cultura: cal reorientar la produccion culturala, sustot la dels joves actors euroregionals, cap a lanumerizacion dels contenguts artistics.
Dich aiçò, e amb la volontat de contribuir a aqueles objectius, lo Fons d’ajuda s’estructura en dos grands blòcs:
1) d'ajudas destinadas a consòrcis o a autras formes d’associacion que presenten projèctes d’una durada de 18 meses. Los projèctes que se presenten auràn d’ajudar a donar una responsa als objectius someses mai amont.
2) d'ajudas destinadas a realizar d'estudis prospectius que respondan als objectius someses per l’Euroregion e que fagan possibla qu'universitats, centres de recèrca, entrepresas e expèrts pòscan trabalhar ensemble per i donar una responsa comuna.
Lo fons d’ajuda euroregional a una durada de 18 meses e lo sieu objectiu final es lo desvolopament d’una mai granda capacitat de resiliéncia davant lo malastre actual. Doncas, lo fons centra los sieus esfòrces a consolidar la cooperacion entre los actors euroregionals per los ajudar a sortir de la situacion de crisi.
Avaloracion dels projèctes e proposicions
Los projèctes e proposicions presentadas lor cal atènyer los resultats esperats, que se descrivon al reglament del Fons d’ajuda euroregional. En aquel esgard, an d’aportar una valor aponduda: lor cal èsser precises, concrèts e tanben mesurables –tant qualitativament coma quantitativament– mejançant d'indicadors preliminarament definits.
Cada comitat sectorial del EPM convocat en jurada seleccionarà per unanimitat los beneficiaris del Fons de sosten e la soma de l'ajuda que los serà assignada.
La durada de las accions previstas pels projèctes seleccionats non deu pas superar dètz-e-uèch meses. Es indispensable que los beneficiaris del Fons de sostenement sián domiciliats als territòris de l’Euroregion Pirenèus Mediterranèa.
Presentacion de candidaturas
Per sollicitar l’ajuda, cal emplir lo formulari que se tròba al siti www.euroregio.eu –ont tanben s’i tròban las basas–, lo signar e l'enviar amb los documents sollicitats a l'adreça seguenta en lenga francesa o catalana :courrier@euroregio-epm.eu
Proximitat de l’Euroregion Pirenèus Mediterranèa davant la crisi de la Covid-19.
Coma estructura de cooperacion territoriala que depend dirèctament dels govèrns de las Islas Balearas, de Catalonha e de la Region d’Occitània, l’EPM es conscienta de la dura realitat que vivon a l'ora d'ara los tres territòris. Vòl per aquò aportar la siá expertesa en solidaritat e cooperacion tot en trabalhant, amb una vision europèa, amb lo territòri e per aqueste. Uèi lo jorn, las valors de l'integracion europèa son fondamentalas, mai que mai en un moment que se demòstra que la melhora manièra de far front als efièches de la Covid-19 consistís a trabalhar de biais coordinat e solidari entre territòris.
La singularitat de l’EPM, un projècte de cooperacion politica unica, facilitarà las valors d'engatjament e de collaboracion entre los govèrns regionals. Pasmens, la situacion de crisi actuala es una granda escasença per enfortir los ecosistèmas euroregionals creats mercé a la constitucion de l’EPM, dins l'amira de desvolopar una melhora resiliéncia fàcia a futuras crisis o epòcas d’incertitud.
Engatjament de las presidéncias
Pendent lo mes d'abril, la presidenta del Govèrn de las Islas Balearas, Francina Armengol; lo president de la Generalitat de Catalonha, Quim Torra; e la presidenta de la Region d’Occitània, Carole Delga; manifestèron ja en senglas letras la lora preocupacion pels efièches de la pandèmia de la Covid-19 a escala euroregionala. Fruch d’aquela inquietud, lo fons d’ajuda s’es constituit coma una pròva indobtabla de l'engatjament de l’EPM e dels sieus dirigents envèrs los territòris e los ciutadans qu'i trabalhan.
.