Lo govèrn de Catalonha considèra viabla una ret de trins regionals de nauta velocitat que connècte Catalonha e Occitània, e mai concrètament las vilas de Lhèida, Tarragona, Barcelona e Girona amb Montpelhièr e Tolosa de Lengadòc, segon informa lo jornal catalan El Punt AVUI. Aquela ret seriá possibla tre 2020, amb la liberalizacion dels servicis ferroviaris de l’UE. Lo president de Camins de fèr de la Generalitat de Catalonha (FGC), Ricard Font, presentèt ièr a Girona un estudi que detalha los ponches fòrts d’aquel servici e anoncièt qu’i a de negociacions amb d’operators privats. D’unes donadas que recuèlh l’estudi, se calcula que lo nombre de viatgèrs annals seriá de 3,8 milions e qu’i auriá sièis trins jornalièrs entre Lhèida, Montpelhièr e Tolosa, en un interval de prètz per un trajècte entre Barcelona e Montpelhièr/Tolosa entre los 30 e los 90 èuros segon flexibilitat e classa.
L’estudi determina tanben que la dintrada del servici menarà un deficit de 3,94 milions d’èuros annals. Mas segon Font s'agís d’una quantitat “relativament pichona” e que se poiriá recoperar en pauc temps. “Tot aquò, en nos situant totjorn en un procès de liberalizacion que los canons ferroviaris sián los actuals; se los canons davalèsson, que seriá çò de mai normal dins un procès de liberalizacion del servici ferroviari. Parlam totjorn tre 2020, çò que menariá a una melhora fòrça importanta de la productivitat e parlariam pas de tres milions en negatiu. Dins tres o quatre ans poiriam parlar ja de numèros positius”, diguèt. La direccion de FGC somèt l’operacion amb d’autres operators ferroviaris que son pas las companhiás públicas espanhòla Renfe e la francesa SNCF, qu’aurián poscut oferir aquel servici dempuèi lo 2013 e o fan pas. Entre los operators que mantènon las negociacions, i a Ilsa (ligat a Air Nostrum) e l’italiana NTV.
Aquel nòu servici de trins regionals de nauta velocitat que vòl mètre en plaça lo govèrn de Catalonha permetriá donar rendabilitat lo tram transfrontalièr de nauta velocitat (TAV Figueres Vilafant-Perpignan). Ara s’agís d’una linha de longa pauc utilizada. “I arriban sonque 12% dels trins previstes, que siá de passatgièrs o de mercaderias”, concrèta lo director de la concession internacionala Figueres-Perpinhan (LFP), Petros Papaghiannakis, qu'explica que, entre las dificultats qu’i a per poder far créisser lo nombre de trins. I a subretot de ”barrieras tecnicas”, ligadas a aspèctes de senhalizacion e d’electrificacion. D’efièch, d’unes trins, los Avant que se devon arrestar a Figueres-Vilafant perque pòdon pas arribar fins a Perpinhan. Los TER franceses pòdon pas tanpauc far lo trajècte fins a Figueres. Segon Papaghiannakis, s'aquò se resòlt, se poirà tanben aumentar lo trafic de mercaderias pel tunèl del Pertús, que recèp ara entre tres e quatre trens jornalièrs.