Quatre vaissèls de la Marina dels Estats Units penetrèron a la mar de Barents, davant la còsta nòrd-occidentala de Russia, pel primièr còp dempuèi lo decènni de 1980, a informat la sièisena flòta de la Marina dels Estats Units per mejan d'un comunicat. Malgrat èsser aigas internacionalas, la mar de Barents es una zòna militar de Russia. La flòta del Nòrd de Russia, lo còr de l'Armada russa, es establida a Severomorsk, en una baia davant de la mar de Barents.
La Marina nòrd-americana explica que notifiquèt divendres lo Ministèri de la Defensa rus la siá intencion d'enviar de naus a Barents. L'armada de Russia a fait saber en un comunicat que "de naviris actius de la flòta del Nòrd an observat las activitats del grop d'atac de l'OTAN". Las tensions militaras entre los Estats Units e la Russia contunhan d'èsser nautas, sièis ans après l'annexion de Crimèa per la Russia. Fa doas setmanas, Estats Units acusèt la Russia de provar un missil anti-satellit après que Moscòu entamenèt de conversacions per limitar lo desplegament d'armas dins l'espaci ultra-terrèstre.
.