Los observaires internacionales del jutjament contra l'independentisme catalan denóncian de violacions dels dreches umans

International Trial Watch presenta a Madrid las conclusions definitivas dels observaires internacionales sul jutjament e la senténcia contra lo Procès catalan. Los observaires internacionales que seguiguèron cada session del jutjament contra lo procès en la Cort suprèma espanhòla pendent quatre meses denóncian que lo tribunal a violat qualques dreches fondamentales dels preses politics. Concrètament, es estat violat lo principi de legalitat penala, lo drech de la libertat, la libertat d’expression, la libertat ideologica, lo drech de reünion pacifica, lo liure exercici de carga publica representativa e lo drech a un procès just e amb totes los gatges.

International Trial Watch conclutz que la senténcia es "una resolucion clarament ideologica amb la pretension de substituir la necessària solucion politica del conflicte que demòra en Catalonha". Los observaires dison que, per condemnar per sedicion, la Cort suprèma "confond lo soslevament [que requerís lo delicte de sedicion] e una reünion pacifica", en dos moments concrèts: la concentracion de protèsta del 20 de setembre e las votacions del 1èr d'octobre. Comprenon pas perqué, se la senténcia considèra qu'aquelas doas mobilizacions èran de soslevaments, l’Estat activèt pas l’estat de sètge o d’excepcion, prevists per de situacions excepcionalas e per empedir aquelas supausadas susmautas. ‘La responsa es evidenta: perque aquò que passava èra pas pas una revòlta mas l’exercici del drech collectiu de reünion e de protestacion’.

.