Los presonièrs politics catalans, elegits a las darrièras eleccions estatalas del 28 d’abril del 2019, an promés lor cargue al Senat e al Parlament espanhòl, en una ceremònia vergonhanta en la quala los deputats nacionalistas espanhòls daissèron pas escotar las paraulas dels catalans en donant de còps contra la taula. Oriol Junqueras, Josep Rull, Jordi Turull, Jordi Sànchez e Raül Romeva, participèron a las sessions constitutivas del congrès e del senat espanhòl en mostrant la manca de coeréncia d'un estat espanhòl tocat per la repression politica contra los independentistas.
Bona pròva d'aiçò en son las intencions de suspendre los cargues dels presonièrs en las doas cambras de la part dels partits nacionalistas espanhòls. Aital, la nòva presidenta del Congrès espanhòl, la socialista Meritxell Batet, a exigit aqueste dimècres matin dins la segonda cambra de la Cort suprèma que s'sclarisca se cal suspendre Oriol Junqueras, Josep Rull, Jordi Turull e Jordi Sànchez del cargue de deputats a la cambra bassa.
La decision d’aplicar la suspension dels presonièrs politics correspondrà al burèu del Congrès e del Senat, qu'a una majoritat progressista. Mas poiriá èsser que se trenque l'unitat de la partida d’esquèrra en aquel organ, e que lo PSOE, partit nacionalista espanhòl, acabe per aprovar amb la rèsta dels partits nacionalistas de drechas, PP e Ciutadans.
Mentretant, lo president del govèrn catalan en exili, Carles Puigdemont, e los conselhièrs Toni Comín e Clara Ponsatí an aprofechat aquestes darrièrs jorns abans de las eleccions europèas per viatjar cap a Londres. Los tres candidats de la lista de Junts per Catalunya ("Amassa per Catalonha") se son amassats aquela serada amb de deputats britanics en lo Parlament de Westminster.
Pendent la reünion, los politics an escambiat la lora vision sus de la Catalonha amb de membres del grope d'amistat ''All-Party Parliamentary Group on Catalonia''. "Lo lor engatjament amb la democracia e los drèits fondamentals es impressionant", a destacat Puigdemont.