Lo govèrn de Trump menaçava de vetar un tèxt que parlava de porgir de servicis de "salut sexuala e reproductiva" a las victimas de violacions en conflictes armats.
Las Nacions Jonchas lor a calgut rebaissar una resolucion sus la lucha contra la violéncia sexuala en los conflictes armats per evitar lo veto dels Estats Units, que s'opausavan a quina referéncia que siá a garantir l'accès de las victimas a servicis de "salut sexuala e reproductiva".
Lo govèrn de Donald Trump vei en aquela frasa un supòrt implícit al avortament, e a obligat a retirar del tèxt final un fragment qu'èra estat acordat per consensus pels 15 integrants del Conselh de Seguretat après una dimenjada de negociacions intensas.
Lo borrolhon, presentat per Alemanha, parlava de l'"importància de donar assisténcia a temps a las subreviventas de violéncia sexuala" e sollicitava a facilitar "de servicis sanitaris pas discriminatòris e amples, compresa la salut sexuala e reproductiva, supòrt psico-social, legal e de sosteniment".
A la fin, la delegacion alemanda a accedit a retirar aquel paragraf. L'ambaissador alemand davant l'ONU, Christoph Heusgen, o explicava d'aquela manièra.
"Voliam aver la salut sexuala e reproductiva a la resolucion, mas demorava clar qu'èra pas possible. Per una delegacion [los USA] èra pas una opcion."
"Es intolerable e incomprensible que lo Conselh de Seguretat siá emplàstic de reconéisser que las femnas e las mainadas qu'an patit violéncia sexuala pendent conflictes e que, evidentament, an pas elegit se demorar embarassadas, an drech a decidir interrompre lo sieu embaràs."