A las 9 del matin, los collègis electorales an dobèrt las pòrtas per las votacions de las eleccions generalas dins lo Congrès de Deputats e dins lo Senat espanhòl, marcadas per l'incertitud dels resultats. En total, 36.800.000 personas dins tot l'estat poiràn exercir lo drech a votar.
Los 23.000 collègis se son dobèrts amb tota normalitat sens incidéncias destacablas, e s'an constituit totas las mai de 60.000 mesas, segon a informat lo ministèri de l'Interior a dos quatrens de 11 del matin, en la siá primièra comparucion.
Aquelas eleccions son marcadas per la situacion del conflicte politic a Catalonha, amb l'existéncia de preses politics, amb un jutjament contra lo referendum d'independéncia que votèt lo pòble de Catalonha e amb la manca generalisada de libertats. I a tanben cèrta incertitud sus un possible aument a Espanha del vòt de la ultra-drecha nacionalista espanhòla, après l'intensa campanha de promocion que los mejans espanhòls an fach los darrièrs meses de la formacion fascista 'Vox'.
Per tot plegat, aquelas pòdon èsser unas eleccions claus per la venir de la democracia a Espanha. Practicament totes los debats que los candidats an realizat e pendent tota la campanha lo tèma principal es estat lo conflicte politic qu'Espanha manten dobèrt amb Catalonha.
Qualqu'uns dels preses politics catalans son candidats en aquelas eleccions, coma l'activista sociala Jordi Sánchez (Junts per Catalunya), l'ex-eurodiputat Raül Romeva (Esquerra Republicana de Catalunya - ERC) o lo vice-president de Catalonha, Oriol Junqueras (ERC). Totes eles lor a calgut far la campanha electorala dempuèi la preson.
Lo candidat pel Partido Socialista Obrero Español (PSOE) e president d'Espanha en foncions, Pedro Sánchez, es estat lo primièr de votar, pauc abans de dos quatrens de 10 del matin, en un collègi de Pozuelo d'Alarcón, Madrid. Sánchez a fach una crida a la participacion per garantir una majoritat parlamentària que permeta "un govèrn d'estabilitat". Fins a las 12 del miègjorn, a pas votat lo candidat per la presidéncia del Partido Popular (PP), Pablo Casado, qu'o a fach a Madrid. Casado A dich tanben qu'espera que de las urnas ne sòrta "un govèrn estable". Per el las darrièras legislaturas son estadas "falhidas". Lo cap de Podemos, Pablo Iglesias a votat en un collègi de Galapagar. A dich tanben qu'espèra una nauta participacion que pòrte a las urnas una "ampla majoritat progressista."