Lo president del govèrn espanhòl, lo nacionalista espanhòl e socialista Pedro Sánchez, a anonciat aquel divendres la dissolucion de las Corts e la convocacion d'eleccions generalas pel prèp 28 d'abril. Pedro Sánchez o a anonciat après comunicar la data als membres de lo sieu govèrn, que s'es amassat de forma extraordinària.
Sánchez a atribuit la decision al "blocatge" de las fòrças de la drecha a las siás leis dins lo Congrès dels Deputats e a la casuda d'unes "budgèts socials" a mans del PP, Cse tanben de las fòrças independentistas. Mas la realitat es que los sieus aliats als budgèts, los independentistas catalans, li demandavan un gèst per çò qu'es de la reconeissença del drech a l'autodeterminacion de Catalonha e la celebracion d'un referendum.
Cal remembrar que lo partit de Pedro Sánchez, lo PSOE, foguèt un dels tres que, amassa amb las formacions de drecha (PP) e ultra-drecha (C's), apliquèron la polemica e pauc democratica lei 155 de la Constitucion contra la sobeiranetat de Catalonha, amb fòrtas mesuras de repression contra los politics e los activistas socials independentistas. Que se produsiguèt après la declaracion d'independéncia d'aquela nacion. Doncas, èra ja previsible que lo nacionalisme espanhòl qu'impregna lo partit socialista favoririá pas la celebracion d'un referendum democratic.
Cossí que los nacionalistas espanhòls son pas estats dispausats a cedir en aquel aspècte, lo partit socialista a vist coma las formacions independentistas li retiravan lo sieu supòrt e los budgèts generales son pas estats aprovats.
Malgrat aiçò, a considerat que i a "de desbrandas parlamentàrias" coma la dels budgèts que son "de victòrias socialas" perque los ciutadans sabon ja quin es la "fuèlha de rota" e los projèctes de l'executiu socialista.
Dempuèi la siá conviccion qu'Espanha a de besonh avançar, Sánchez a decidit convocar d'eleccions e donar votz als espanhòls:
"Espanha pòt pas pèrdre ni una minuta. Entre pas far e contunhar sens budgèts, o convocar d'eleccions, escuelhi la segonda."
Sánchez es estat fòrça critic amb l'oposicion e amb lo blocatge dels budgèts:
"L'oposicion es aluenhada dels paramètres del sens comun. A bloquejat de leis fòrça importants pel benestar de la ciutadania. S'es bloquejat la tramitacion d'unes budgèts socials, après sèt ans de retalhadas".