Los 9 politics independentistas catalans que son estats de victimas d'un abús legal de la part de l'estat espanhòl, entre eles lo vice-president Oriol Junqueras, en sofrint un an de preson sens jutjament se son seguts uèi dins lo banc dels acusats de la Cort suprèma en çò que se prevei que serà lo jutjament mai injust de l'istòria recenta d'Espanha e Euròpa.
Los ciutadans catalans an pogut veire uèi las caras als dotze politics après longtemps de pas aver d'images d'eles. dins la sala de la Cort suprèma de Justícia espanhòla son demorats situats al mièg de la sala, de cara al tribunal, e seguts de tres en tres dins quatre bancs. Davant, Oriol Junqueras, Raül Romeva e Joaquim Forn; darrièr sieu, Jordi Sánchez, Jordi Turull e Josep Rull; a la tresena fila i a Jordi Cuixart, Carme Forcadell e Dolors Bassa, e a la darrièra, Mundo, Vila e Borràs.
Eles son la mitat del Govèrn de Catalonha que permetèt lo referendum d'independéncia d'octòbre del 2017 e que declarèt la naissença de la Republica Catalana, coma nòu estat europèu. L'autra mitat del legitim govèrn catalan es a l'exili, entre eles lo president Puigdemont, ont se metèron a disposicion de las autoritats que los declarèron innocentas de quin delicte que siá. Es estat tanben lo primièr còp que se son poguts retrobar e veire totes amassa dempuèi que foguèron empresonats dins las divèrsas presons.
Lo jutjament a començat amb la lectura d'un resumit de la causa, de la part del president del tribunal espanhòl, Manuel Marchena, acompanhat dels autres sièis magistrats. Entre las acusacions, en mai de la fiscalia de l'estat espanhòl, i a lo Advocacia de l'Estat e l'acusacion particulara, qu'en aquel cas es la polemica formacion fascista e ultra-dretanaVOX. De la part de la Fiscalia, aquel primièr jorn i an assistit Javier Zaragoza e Fisèla Cadena. Dempuèi Vox, Javier Ortega Smith.