Las femnas an acabat amb una enebicion istorica en Índia e ja pòdon dintrar al temple de Sabarimala, dins l'estat de Kerala, ont lor avián vetat l'accés. Aquel temple, coma establís la tradicion locala, negava l'intrada a totas las femnas d'entre 10 e 50 ans perque las considèra “sens puresa”.
Totun, la Cort Suprèma de l’Índia estimèt en setembre que caliá permetre la dintrada a totes. Alavetz, las femnas qu’avián ensajat de dintrar al temple èran estadas atacadas, malgrat la proteccion policièra. La decision de la Còrt Suprèma levèt una fòrta ondada de manifestacions contràrias.
Aquel dimècres las doas femnas de 42 e 44 ans an agut d’i accedir acompanhadas per la polícia. Segon las images balhadas pels mejans locals, anavan vestidas de negre e amb lo cap cobèrt amb mocador. I dintrèron davant d'òmes nombroses après una montada de cinc quilomètres dempuèi la localitat de Pamba.
Las autoritats del temple, qu'acuelh de milièrs de fisèles cada an, considèran que la preséncia de las doas femnas "lo contaminèt" e l'an barrada pendent una ora per "lo netejar", segon an informat los mejans locals.
Lo govèrn de Kerala, qu'es d'esquèrras, defend la decision de la Cort Suprèma, e argumenta qu'a protegit l'intrada de las doas femnas perque s’agís d’una question de dreches civils. Segons lo ministre principal, PinarayiVijayan, ofriràn "proteccion a las femnas quinas que sián per dintrar al temple".