Lo vice-president primièr de la Comission Europèa e candidat dels socialistas a presidir l'institucion, Frans Timmermans, a criticat aquel divendres que los partits de drechas espanhòlas 'Partido Popular' e 'Ciudadanos' pretengan governar amb lo supòrt de l’extrèma drecha fascista. ‘Aquel es lo projècte del Partit Popular Europèu per Euròpa, una coalicion amb l’extrèma drecha?’, s’a demandat en un messatge de Twitter, en afirmar qu'aquela sòrta de formacions ‘refusan las valors europèas mai basicas’.
Dins un segond messatge a Twitter, l’olandés a dich tanben que lo sieu partit ‘formarà pas jamai una coalicion amb l’extrèma drecha a Euròpa’. ‘O lor pòdi garantir’, a conclús lo candidat del Partit Socialista Europèu.
Près de quatre meses perque se celèbren las eleccions europèas, lo pacte de govèrn en Andalosia es arribat fins a Brussellas. Del temps qu'aquel divendres s’a prononciat Timmermans, dijòus o faguèt Guy Verhofstadt, lo cap a l’Eurocambra pel grop dels liberals, ont s’intègra Ciudadanos. Lo bèlga assegurèt tanben a travèrs d’un messatge que lo partit d’Albert Rivera a pas fach ‘de concessions ni d'acòrdis amb Vox’.
Per contra, afirmèt èsser ‘content’ de veire la formacion 'Ciudadanos' dins lo govèrn andalós ‘amb un programa centrista e reformista e sens concessions ni acòrdis’ amb lo partit d’extrèma drecha liderat per Santiago Abascal.