Uèi, 16 de genièr, es estat inaugurat lo Casal Catalan de Montpelhièr amb una amassada generala ont se presentèron los objectius fondators de l'associacion novèla qu'espèra èsser reconeguda oficialament en Prefectura aprèp un refús per un suposat error dins la constitucion del dorsièr administratiu.
Dins aquesta amassada i assistiguèron un quinzenat de personas d'atges e mestièrs plan divèrses que manifestèron lor desiri de transmetre la lenga e cultura catalanas en defugir lo combat catalanista independentista pròpri del ròtle que jòga lo CDR montpelhierenc.
Los amassats an un ligam amb Catalonha per de rasons diferentas. D'un latz, i a d'unes catalans nascuts al Principat que demòran a Montpelhièr per de rasons professionalas o per estudis. D'autre latz, de franceses de Catalonha Nòrd o d'endacòm mai qu'an una part de la familha catalana, d'enfants d'exiliats de la Guerra Civila Espanhòla.
L'escambi entre los amassats foguèt profitós per conéisser las motivacions de cadun. I aurà lèu un rescontre cultural del Casal amb los estudiants occitanistas de l'universitat montpelhierenca per se far conéisser e bastir d'escambis entre los dos mitans culturals.