Un mainat immigrant originari de Guatemala qu'èra jos custòdia del Govèrn dels Estats Units es mòrt aquel dimars dins un espital de l’estat de Nòu Mexic après d’aver crosat irregularament la frontièra amb Mexic, segons informa lo Burèu de Doanas e Proteccion Termierèra (CBP, en anglés). Dins d’un comunicat, la CBP detalha que lo mainatge, de 8 ans, moriguèt passada la mièjanuèit e per causas que se desconeisson encara. Es lo segond enfant procedent del meteis país que pèrd la vida jos la tutèla de las autoritats nòrd-americanas en mens d’un mes.
Un agent remarquèt aquel diluns que lo mainat èra malaut, e per aquò tant lo mainatge coma son paire foguèron transportats al Centre Medical Regional Gerald Champion a Alamogordo, Nòu Mexic, ont lo mainat foguèt diagnosticat amb un costipat, segons un comunicat de premsa de CBP.
Mai tard, se descobriguèt qu'aviá fèbre e foguèt retengut una ora e mièja de mai abans d'èsser donat per guerit après li prescriure amoxicillina –un dels antibiotics– e ibuprofèn, abitualament utilizat per calmar la dolor e davalar la fèbre. Mas lo pichon demorèt malaut e mai grèvament pendent la nuèit, quand comencèt a vomitar, e foguèt transportat de nòu a l’espital, ont moriguèt pauc après la mièjanuèit del jorn de Nadal, segons informa The Washington Post.
Lo paire e lo filh son pas estats identificats per la CBP, qu'a dich que farà conéisser mai de detalhs "segons sián disponibles e sián apropriats".