L'òrdre de retirada de las tropas nòrd-americanas de Siria es estada signada, segons informèt lo Pentagòn. Çaquelà aquest diluns comença oficialament l'operatiu de traslat dels soldats. Segons la CNN, l'òrdre es estada signada pel general James Mattis, qu'abandonarà son pòste de secretari de Defensa dins qualques jorns.
Mattis anoncièt sa sortida de l'executiu dijòus passat, l'endeman que Trump anoncièsse son intencion de far tornar als Estats Units los 2.000 militars desplegats al nòrd-èst del país, ont lutavan contra Estat Islamic al bòrd d'una coalicion de milícias àrabo-curdas. L'Ostal Blanc creis que la preséncia de las tropas de son país a Siria es pas mai necessària perque Estat Islamic es gaireben vençut.
En mai del secretari de Defensa, l'enviat especial nòrd-american per la coalicion contra Estat Islamic, Brett McGurck, presentèt tanben sa demission per la decision de Trump. Tant Mattis coma McGurck exprimiguèron publicament sa preocupacion per la manièra amb que Washington tractèt sos aliats a Siria.
Lo Pentagòn a detalhat que la retirada se farà pauc a cha pauc e de biais coordenat amb Turquia per evitar un void de poder dins la zòna que pòsca beneficiar lo regim d'Al-Assad. Mas aquela situacion daissarà las milícias curdas en Siria sens supòrt militar e amb la menaça turca de las atacar, car las considèra organizacions terroristas.
Lo president Trump creis qu'a complit son objectiu en derrotant los jihadistas e opina que d'autres païses, coma Turquia, pòdon acabar lo trabalh que los Estats Units comencèron dins aquel país. Lo mandatari nòrd-american anóncia dins Twitter que lo dictador Erdogan collabòra en aquel procès.