Lo matin del 21 de decembre es estat marcat per las protèstas de catalans independentistas. La preséncia del Conselh de Ministres del govèrn espanhòl, amb lo president Pedro Sánchez davant, a provocat de divèrsas manifestacions independentistas a Barcelona e fòrça mobilizacions a la rèsta de Catalonha, que se son saldats amb 13 detenguts e 77 ferits.
Aquela serada s'es concentrada mai de 40.000 personas, segon la polícia, en una manifestacion unitària en favor dels dreches civils e politics dels preses independentistas convocada per la Comission 21D a Barcelona.
La plataforma, qu'agròpa de desparièrs movements, sindicats e partits independentistas, a denonciat la criminalizacion de l'independentisme que, segon eles, fan qualques mejans de comunicacion e partits espanhòls e la creacion d'un climat de paur, menaças, repression e division, basat en çò que qualifican de relat fals de la violéncia.
L'acte final l'a presentada l'actor Pep Planase i a agut de divèrses parlaments. Los primièrs a parlar son estats Marta Torrecillase Roger Español, que son estats recebuts amb crits de "1 d'octòbre, ni oblit ni perdon". Torrecillas e Español an qualificat lo Conselh de Ministres a Barcelona de "provocacion" e "mòstra de poder" e an considerat las mesuras aprovadas "insufisentas" e "de marrit gost".
A l'entorn de la Lòtja de Mar, qu'es ont i aviá la reünion del govèrn de Pedro Sánchez, s'es viscut un matin de protèstas amb qualques incidents e rambalhs, sustot a l'avenguda del Parallel, l'avenguda de las Drassanes e la Via Laietana de Barcelona. Almens 13 manifestants son estats detenguts e 77 personas lor a calgut èsser recebudas per feridas.
Dotze detenguts en total, a Barcelona e al sud de Catalonha, en las protèstas contra lo Conselh de Ministres espanhòls. I a agut lançament de pèiras e caladas, pòdes de pintura e pòdes de fum de la part d'una minoritat de manifestantas radicalas amb la cara cobèrta, environats d'una granda majoritat de manifestants pacifics que cridavan de consignas a cara descobèrta.
A comptar de las tres de la serada a davalat la tension, mas es demorat encara de gents concentradas a la Via Laietana fins a mièja serada. dins la zòna de Corrièrs son demorats qualques grops de manifestants seguts dins tèrra. Los independentistas an criticat fòrça la violéncia policèra que, en fòrça cases, es estat desproporcionada e brica avienta.
