Onze personas son mòrtas aquela matinada a las proximitats de Carcassona pels aigats que queigueren dins un ample airal de l'Occitània per efièch del passatge de l'auragan Leslie. En un primièr moment, las autoritats francesas an anonciat qu'èran tretze las victimas mortalas de l'auragan, mas la chifra es estada modificada per las meteissas autoritats francesas.
Lo prefècte del departament de l'Aude, Alain Thirion, a informat uèi dins unas declaracions dins lo canal BFMTV que tretze personas son mòrtas e a insistit que lo fenomèn contunha e que i a mièg centenat de localitats incomunicadas per talhs a las rotas.
Dos dels mòrtes foguèron trobats a la localitat de Villegailhenc, a soslinhat Thirion. Un autre dels mòrtes es una femna a quala rosiguèt l'aiga a Vilardonèl, expliquèt lo sieu cònsol, Daniel Geri, dins unas declaracions a l'emissora France Info.
Lo departament de l'Aude se tròba dempuèi aquela passada nuèch n'alèrta roja pel passatge de la tempèsta tropical Leslie, qu'après aver traversat la peninsula Iberica arribèt al sud de França de matinada. Los servicis meteorologics soslinhèron que la tèsta de pluèjas provoquèt de precipitacions de fins a 50 litres per mètre cairat per ora al nòrd de Carcassona.