Dempuèi lo 20 de setembre del 2017, lo jorn que la Guardia Civil espanhòla dintrèt dins la Conselheria d'Economia, en la Catalonha del Nòrd son estadas menadas totas las convocacions popularas e protestacions que se son faches al Sud. Lo ròtle d'aquel territòri es estat clau dins los moments mai importants dels darrièrs meses.
Lo conse de Prats deMolló, Claude Ferrer, expliquèt que fa d'annadas aguèt una convèrsa ambl'ex presidenta del Parlament, Carme Forcadell, e qu’a pensat fòrça en ela dins aqueles darrièrs tempses:
"Carme Forcadell èra ja venguda aicí fa tres ans e aviam parlat de tot çò que riscava en fasent tot aquò. Es per aquòque diguèri a Carme quese aviá paur d’acabar en preson un jorn, que podiá venir aicí en cò mieu, a Prats de Molló, perque quitament lo president Macià s'amaguèt a Prats de Molló l'an 1928. Li diguèri aiçò enton de badinada e juri qu'auriá jamai pensat qu'aiçò arribariá. E ara aiçò s’es passat en Catalonha!".
Claude Ferrer a viscut los darrièrs meses de situacions que li semblavan inimaginables. Per exemple, quand la Guardia Civil cercava lo president Puigdemont, gaitèt coma i aviá d’agents espanhòls que dintrèron d’un mièg quilòmetre dins lo territòri francés per escorcolhar sos vesins.
La Catalonha del Nòrd es totjorn estada una tèrra de refugi pels catalans del sud e lo sentiment d'estima e de solidaritat apas jamai desaparegut.
Ara, lo conse de Prats de Mollo a mes una estança a disposicion dels familiars dels preses politics per se ne vòlon far usatge. Abans que comence lo jutjament, Claude Ferrer anarà, amb un centenat mai de conses, a Lledoners e Puig de les Basses a exprimir lo sieu sosten als membres del govèrn catalan empresonats.
Totes an signat un manifèst per reclamar als caps europèus que condemnen la repression de l'estat espanhòl. Lo cònsol de Pesillà de la Ribera, Jean-Paul Billés, soslinha que sosténer aquelas practicas pòt establir un precedent perilhós per totes.