Grop de cantaires "Lo Cocut" a Somieras.
Nadal apròcha e de grops de musica nombroses oferisson de concèrts de pertot en Occitània. Las associacions occitanistas se meton sovent a las tradicions de la musica del païs, e d’aquesta passa, cantan de Nadalencas. Es lo cas del grop “Lo Cocut” que cantèt a Somieras (dins lo Gard, Lengadòc Bas) dimècres 12 dins un pichòt restaurant dins un vielh ostalet amb d’arcadas plan polit!
Esteve Hammel, cap del grop e ancian cargat de mission de region del Lengadòc-Rosselhon fa un vintenat d’annadas, se carguèt d’explicar al public lo contengut e l’istòria de las cançons ansi que lo ròtle social dels Nadalets. S’agís plan d’una tradicion populara occitana provençala que subrevisquèt a la Revolucion Francesa.
Un còp l’explicacion agradiva facha per Hammel, lo grop se metèt a cantar, amb energia e jòia, amb un public que, sovent descobriguèt de cançons pauc conegudas, perque de Nadalencas n’i a fòrça. Cantèron de nadalets benlèu mens coneguts pel grand public occitanista coma “Pastres, Pastretas”, “Nadal de Pesenàs”, “Cantem coma cal”, ”Nadal Tindaire” o “Pastres de Montanhas”. A la fin del concèrt, se cantèt la version occitana de “L’Estaca” de Lluís Llach amb estrambòrd.
La letra d'una dels nadalets.