Desespèr del govèrn de Macron amb lo tèma de la violéncia en qualques centres escolars de França. L'executiu francés poiriá desplegar de polícias als prèps jorns dins determinadas escòlas. O a anonciat uèi matin Christophe Castaner, nòu ministre de l'Interior e òme de maximala confidança del president Macron.
Acompanhat dels ministres de Justícia e d'Educacion, Castaner a presentat de divèrsas mesuras que respondon a l'alarma que se creèt fa unes jorns ras d'un vidèo que se vesiá coma un jove de 16 ans menaçava amb un pistolet fals una professora en un institut de París.
Als darrièrs meses s'es aumentat la violéncia als centres educatius e als sieus environs, mai que mai als entorns de París. Qualques mejans parlan de dètz mòrts ongan per afrontaments entre bandas. Tot plegat a portat lo govèrn francés a elaborar una mapa amb las zònas mai conflictivas e refortilhar los efectius als comissariats.
Nòu de cada dètz baralhas passan a la region de París e 60% de las personas identificadas son mendres. Segon las investigacions policèras, las causas d'aqueles afrontaments son pauc importantas. Una simpla empentassa al mètro, una provocacion a las rets socialas o baralhas de tipe sentimental son sufisents per alugar flama.
